Army pinaigting ang usapin sa pagresolba ng military reservation
Puspusang pinapaigting ng 7th Infantry Division ng Philippine Army sa
pamumuno ni MGen. Ralph A Villanueva ang pakikipag-ugnayan sa lokal na
pamahalaan at mga mamamayang kasalukuyang naninirahan sa loob ng
military reservation ng Fort Magsaysay, Nueva Ecija upang mabigyang
linaw at solusyon ang usapin hinggil dito.
Sa kasalukuyan, patuloy na isinasagawa ng 7th Infantry Division ang
pakikipag-usap sa mga mamamayan kasama ang ahensiya ng pamahalaan na
siyang may direktang kinalaman sa military reservation upang
maipaliwanag sa mga mamamayan ang kanilang estado patungkol sa usapin sa
military reservation.
Noong taong 1991, ipinagkaloob ng Department of National Defense ang
kabuuang 3,100 ektarya ng lupaing sakop ng military reservation sa
Pinatubo Komisyon na siyang ipinamimigay sa mga katutubong biktima ng
bulkang Pinatubo at kwalipikadong mamamayan. Subalit umabot lamang sa
1,300 ektarya ang kubuuang lugar na natirhan ng mga katutubo kung kaya't
noong taong 1997, ibinalik nila ang hindi nagamit na 1,800 ektarya at
ito ay kasalukuyang napapaloob sa military reservation.
Ito ay taliwas sa nakasaad sa isang polyetong ipinakalat ng isang
samahan na kung tawagin ay "Almana 3100" na may petsang Setyembre 2008
na naglalaman ng mga maling paratang tulad pagsasagawa ng mga kinatawan
ng kampo ng tangkang pagpapalayas sa mga magsasaka sa loob ng Fort
Magsaysay, pandarahas, paananakot at panlilinlang ng mga kinatawan ng
kampo, panununog sa mga kubo at pananim, at walang habas na pamamaril
upang sila ay itaboy sa kanilang lupaing binubungkal.
"Ang mga paratang na ito ng "Almana 3100" ay pawang kasinungalingan at
ito ay naglalayong magtanim ng galit at poot sa mga mamamayan upang
himukin ang mga taong kasalukuyang nakatira at nagsasaka sa sakop ng
military reservation upang mag-alsa laban sa pamahalaan," ani ng
tagapagsalita ng 7th ID na si Maj Charlemagne F. Batayola Jr.
"Ang ganitong mga gawain ay gawa lamang ng mga taong nagnanais na manira
na kanilang sinasakyan ang ganitong isyu upang linlangin at kunin ang
simpatiya ng mga mammamayan para sa kanilang pansariling interes.
Kailanman, hindi magtatagumpay ang "Almana 3100" sa kanilang layuning
paninira at panlilinlang. Nais ipaunawa ng pamunuan ng 7th Infantry
Division na ginagamit lamang ang isyung ito ng mga kalaban upang sirain
at dungisan ang integridad ng pamunuan ng 7ID," dagdag pa nito.
Ang pamunuan ng Philippine Army, particular ng 7th Infantry Division ay
nananawagan sa lahat ng mga mamamayang nasasakupan ng military
reservation na magkaisa, magtulungan at dumulog sa tamang kinauukulan
upang maresolba ang usapin tungkol sa military reservation. Mag-ingat
ang bawat isa sa mga mapaglinlang na gumagamit ng maling pamamaraan na
ang tanging biktima ay mga mamamayan. #
|
