Bayanihan: Sagot ng Army sa Insurhensiya
KAMPO O'Donnell, Capas, Tarlac - Ang salitang 'bayanihan' ay isa sa mga
natatanging tradisyon ng mga Pilipino kung saan nagtutulungan ang isang
pamayanan na buhatin ang tahanan ng isang pamilya na lilipat sa ibang
lugar. Ang "bayanihan" ay maihahantulad din sa pagkakaisa at
tulung-tulong na pagkilos ng mamamayan sa paglutas ng pambansang
suliranin.
Alinsunod sa layunin ng ating pamahalaan na wakasan ang insurhensiya sa
ating bansa sa taong 2010, nabuo ng Light Armor Division ng Philippine
Army ang konsepto ng "Bayanihan" upang maiparating sa mamamayan na ang
ating pamahalaan ay tapat sa paghahangad ng pang-matagalang kapayapaan
at kaunlaran upang sila’y hindi malinlang ng mga huwad na pangako ng mga
makakaliwang grupo.
Nakapaloob sa nasabing konsepto ang mga sumusunod: paghahatid ng libreng
serbisyong medikal at dental, libreng gamot sa tulong ng mga ibat-ibang
ahensiya ng pamahalaan at mga Laang Kawal ng Sandatahang Lakas ng
Pilipinas, pagtatatag ng Barangay Defense System para sa kapayapaan,
pagpapalaganap ng kaalaman hinggil sa usaping pang kapayapaan at
pagpapanatili ng kaunlaran at paghimok sa mga naliligaw ng landas nating
kababayan upang yakapin ang demokrasya. Ito ay pinalalaks ng natatanging
pamamaraan sa pakikisalamuha sa mga mamamayan sa pamamagitan Kamay,
Ngiti, Bati (KNB) kung saan ito ay naglalarawan ng personal na
pakikipagkapwa sa bawat isa.
Matatandaan na ang "Bayanihan" ay may mahigit isang taon ng ipinapatupad
ng 3rd Mechanized Infantry Battalion ng Light Arnor Division sa pamumuno
ni Lt. Col. Gilbert I. Gapay na siyang pangunahing may akda ng nasabing
konsepto. Ito ay unang inilunsad sa bayan ng Capas sa lalawigan ng
Tarlac na kung saan sinasabing dito umusbong ang mapaglinlang na
idolohiya ng mga makakaliwang grupo. Naging matagumpay ang nasabing
bayanihan sa ilalim pa noon ng pamumuno ni Major General Isagani C.
Cachuela, dating Punong Heneral ng LAD na ngayon ay Commander na ng
Northern Luzon Command.
Ang bayanihan sa Capas ang nagsilbing halimbawa, inspirasyon at
masasabing isang malaki at epektibong tagumpay hindi lamang ng
Philippine Army maging sa lalawigan ng Tarlac. Matatandaang sa
pagtatapos ng "Bayanihan sa Capas" noong ika-20 ng Agosto 2007 ay
naanyayahang magsalita ang dating kilalang lider ng CPPA/NPA na si
Bernabe Buscayno alias Kumander Dante sampu ng kanyang mga kasamahan na
nagbalik loob sa pamahalaan upang magbigay mensahe patungkol sa masamang
idinulot ng maling paniniwala sa kanila. Dito pinapurihan ni Kumander
Dante ang pamunuan ng Light Armor Division dahil sa kanilang naiiba at
makabagong pamamaraan ng pagbibigay tulong sa mamamayan tungo sa
pagsugpo ng insurhensiya.
Dahil sa magandang layunin ng "Bayanihan," maraming ahensiya ng
pamahalaan ang nagbigay tiwala at tulong para sa lalo pang
pagpapalaganap ng nasabing proyekto. Tumulong silang mabigyan ng
livelihood program ang mga naghihirap nating mga kababayan gaya ng
Mushroom Cultivation at Slipper Making para sa mga pamilyang walang
hanap buhay at T-Shirt Printing naman para sa mga kabataang walang
kakayahang makapag aral sa kolehiyo. Mayroon ding ilan ang pinalad na
makakuha ng trabaho sa ibayong dagat, lahat ay sa tulong ng Public
Affairs Service, Armed Forces of the Philippines Reserve Command (AFPRESCOM)
sa pamumuno ni Col. Eduardo Lacanienta.
Sa kauna-unahang pagkakataon itinanatag sa lalawigan ng Tarlac ang
"Insurgency Free Tarlac Campaign." Dito na ipinapatupad sa buong
lalawigan ng Tarlac ang "Bayanihan" na ngayon ay suportado na ng
pamahalaan ng Tarlac dahil ang layunin nila ay matapos ang problema sa
insurhensiya bago sumapit ang taong 2010. Naglunsad din ng "Bayanihan"
sa mga bayan ng Quezon, Licab at Penaranda na matatagpuan sa lalawigan
ng Nueva Ecija. Dahil na rin sa paglawak ng nasasakupan ng 3rd
Mecahnized Infantry Battalion, inaasahang dadalhin na rin sa Pangasinan
ang nasabing "Bayanihan."
Dahil na rin sa maraming papuring tinanggap mula sa ibat-ibang lokal na
opisyal ng pamahalaan, ahensiya ng gobyerno at sektor ng lipunan,
ipinag-utos ni Major General Samuel D. Narcise, ang bagong Commander ng
Light Armor Division na lalo pang palaganapin ang konsepto ng
"Bayanihan" hindi lamang dito sa Luzon kundi maging sa Visayas at
Mindanao. Pinapurihan din niya ang mga taga-Light Armor sa walang sawa
nilang pagganap sa kanilang mga sinumpaang tungkulin para sa pang habang
buhay na kapayapaan at kaunlaran ng ating bansa. #
|
